Jeff Buckley – Grace 20 ára – Heiðurstónleikar – 18/9

10568803_10203702335790636_2848389747648567339_n

– FORSALA HAFIN Á MIÐI.IS –

20 ár eru liðin síðan meistara stykkið Grace með Jeff Buckley var útgefið og að því tilefni verða haldnir sérstakir heiðurstónleikar á Gauknum, fimmtudagskvöldið 18. september næstkomandi. Jeff Buckley heiðurstónleikar hafa verið haldnir með óreglulegu millibili síðan árið 2002. Valinkunnir tónlistarmenn og konur munu flytja plötuna Grace í heild sinni ásamt því að leika lög af Sketches For My Sweetheart The Drunk og ábreiðum sem Jeff hafði í sínu lagavali á tónleikum víðsvegar um heiminn.

HEIÐURSSVEIT

Franz Gunnarsson – Gítar
Bjarni Þór Jensson – Gítar
Kristinn Snær Agnarsson – Trommur
Birgir Kárason – Bassi
Valdimar Kristjónsson – Hljómborð
Þórhallur Stefánsson – Slagverk

SÖNGVARAR

Kristófer Jensson
Eyþór Ingi Gunnlaugsson
Valdimar Guðmundsson
Rósa Birgitta Ísfeld
Stefán Jakobsson
Finni Karlsson
Finnbjörn Hv. Finnbjörnsson

BAKRADDIR

Erla Stefánsdóttir
Ásta Sveinsdóttir

HVAÐ: Jeff Buckley Grace 20 ára – Heiðurstónleikar
HVAR: Gaukurinn
HVENÆR: Fimmtudagurinn 18. september
KLUKKAN: Húsið opnar 20:00. Tónleikar hefjast 21:00
KOSTAR: 2500kr í forsölu. 3000kr við inngang.
FORSALA: http://midi.is/tonleikar/1/8458

JEFF BUCKLEY

Jeff Buckley fæddist 17. nóvember 1966 í Anaheim, Kaliforníu fylki í Bandaríkjunum. Faðir hans var tónlistarmaðurinn Tim Buckley en Jeff ólst upp með móður sinni Mary Guibert og hitti í raun föður sinn aðeins tvisvar sinnum áður en Tim lést 28 ára að aldri. Mary móðir Buckley og stjúpfaðir voru dugleg að kenna ungum Buckley að meta tónlist Led Zeppelin, Jimi Hendrix, The Who og Pink Floyd.

Jeff komst í kynni við gítarinn 5 ára að aldri þegar hann fann gamlan kassagítar í skáp hjá ömmu sinni. Með gítarinn undir hendi raddaði hann með móður sinni hin ýmsu lög.
12 ára gamall tilkynnti hann móður sinni að hann skyldi verða tónlistarmaður og 13 ára fékk hann sinn fyrsta alvöru rafmagnsgítar, svartan Les Paul.
Í grunnskóla lék hann með djassveit skólans og sótti í framsækna tóna Yes, Genesis og Rush.

Eftir að skólagöngu lauk flutti 19 ára Jeff Buckley til Hollywood og stundaði eitt ár í Musicians Institute. Hann fann sig ekki í náminu en kunni að meta tónfræðina og þá sérstaklega áhugaverðar harmoníur sem hann heyrði í klassískum tónverkum Bartók og Ravel.
Jeff reyndi fyrir sér í hinum ýmsu hljómsveitum sem gítarleikari, spilaði Jazz, Reggae, Funk, dancehall, þjóðlagatónlist og þungarokk en náði aldrei að festa sig í sessi í LA senunni og því pakkaði hann föggum sínum og flutti til New York árið 1990.

Í New York stúderaði Jeff gamlar blúshetjur og harðkjarnatónlist en einna helst indverska og pakistanska Qawwali söngvara, sérstaklega Nusrat Fateh Ali Kahn sem var honum mikill áhrifavaldur. Jeff átti í ástarsambandi við Rebeccu Moore sem veitti honum mikinn innblástur á þessum tíma, kynnti Jeff fyrir Fluxus listahreyfingunni sem hann kom reglulega fram með í hverskyns gjörningum.

Buckley var uppgötvaður 1991 þegar Herb Cohen, gamli umboðsmaður Tim Buckley´s sannfærði Jeff um að koma fram á minningartónleikum um föður sinn í kirkju St. Ann´s í Brooklyn.
Jeff spilaði og söng lag föður síns, I Never Asked To Be Your Mountain ásamt undirleik gítarleikarans Gary Lucas. Jeff stal senunni þetta kvöld með tilþrifum.
Tim Buckley samdi lagið “ I Never Asked To Be Your Mountain” um kornungan Jeff Buckley og var þessi framkoma að sögn Jeff´s ákveðið uppgjör við föður sinn og fortíðina.

Jeff og Gary Lucas byrjuðu að vinna saman að tónlist og áttu þau lög að enda á plötu með hljómsveitinni Gods and Monsters sem Gary stýrði. Þrátt fyrir að samningur væri í höfn og bjart framundan fyrir Gods and Monsters ákvað Jeff að hætta í hljómsveitinni og stefna á sólóferil.

Jeff kom sér á framfæri á kaffihúsum og þá sérstaklega Sin-é þar sem hann tróð upp vikulega. Fiskisagan flaug um hæfileika Jeff og fljótlega myndaðist löng röð fyrir utan Sin-é í hvert sinn sem hann kom fram. Í kjölfarið mættu allir helstu mógúlar í tónlistarbransanum á pínulítið kaffihús til að sjá þennan Buckley sem orðrómurinn mælti með. Á tímabili lokaðist fyrir bílaumferð í götunni fyrir utan Sin-é vegna fjölda eðalvagna (limosine) sem ferjuðu mógúla á borð við Clive Davis sem vildu ólmir gera plötusamning við Jeff. Á endanum gerði Jeff milljón dollara samning við Columbia. Fyrsta útgáfan var EP plata hljóðrituð á uppáhalds litla kaffihúsinu og ber heitið Live at Sin-é.
Platan var útgefin 1993 og setti Jeff Buckley á alþjóðlega tónlistarkortið.

Eftir að hafa fylgt Live at Sin-é eftir með tónleikaferðum um bandaríkin og evrópu snéri Jeff aftur til New York og safnaði liðsmönnum saman í hljómsveit og hóf að leggja drögin að fyrstu alvöru plötunni.

Grace er eina stúdíó platan sem Jeff Buckley gaf út á sínum stutta ferli. Jeff ásamt hljómsveit sinni og upptökustjóranum Andy Wallace unnu plötuna á sex vikna tímabili í Bearsville Stúdíó sem er staðsett hjá Woodstock í New York fylki Bandaríkjanna.

Viðtökurnar voru dræmar til að byrja með og náði platan 149. sæti á Billboard listanum þegar hún var gefin út.

Jeff og hljómsveit lögðust í víking og fóru í tveggja ára langt tónleikaferðalag til að fylgja plötunni eftir og það borgaði sig því hægt og rólega fóru tónlistarunnendur og spekúlantar að átta sig á hversu mikill hæfileikamaður Jeff Buckley var. Í dag hefur Grace selst í milljónum eintaka og dúkkar upp á listum sem tilgreina bestu plötur allra tíma í tímaritum eins og Rolling Stone, Q magazine og Mojo.

Ábreiðan Hallelujah eftir Leonard Cohen er án efa vinsælasta lagið af Grace. Lagið fór til að mynda á topp breska og bandaríska vinsældarlista jólin 2008, 11 árum eftir að Jeff féll frá og í apríl á þessu ári var lagið vígt inn í Library of Congress’s National Recording Registry en það þykir mikill heiður að vera þar inni enda eiga þau lög það sameiginlegt að endurspegla menningararf Bandaríkjanna.

Eftir að hafa fylgt Grace eftir um heiminn sleitulaust í tvö ár fór að gæta þreytu innan hljómsveitarinnar. Trommarinn Matt Johnson gafst upp á endalausum ferðalögum og hætti í hljómsveitinni. Jeff dró sig í hlé og flutti til Memphis. Hann vann að músík á 4 rása upptökutæki og spilaði reglulega á lókal tónleikastaðnum í hverfinu einn síns liðs til að prufa ný lög með áheyrendum. Nýr trommari að nafni Parker Kindred var kominn í hljómsveitina og upptökustjórinn Tom Verlaine (Television) var ráðinn til að gera næstu plötu.

Jeff var reglulegur gestur í dýragarð Memphis þar sem hann eyddi löngum stundum hjá Sumatran tígrisdýrunum. Hann lagði inn umsókn um að gerast sjálfboðaliði fyrir dýragarðinn viku áður en hann lést langt um aldur fram. Minningarskjöld um Jeff er að finna hjá tígrisdýrabúrinu í Memphis dýragarðinum.

Þann 29. maí 1997 fór Jeff ásamt rótaranum sínum Keith Foti niður að Wolf River sem tengist Missisippi ánni eftir kvöldverð til að drepa tímann þangað til hljómsveit Jeff´s myndi lenda í Memphis síðar um kvöldið. Hljómsveitin var bókuð til að mæta í upptökur daginn eftir til að hljóðrita aðra plötu Buckley´s. Jeff óð út í ánna og tók til að synda baksund á meðan hann söng með lagi Led Zeppelin Whole Lotta Love sem glumdi úr ghettoblaster sem þeir félagarnir höfðu meðferðis. Bátur átti leið hjá í töluverðri fjarlægð frá Jeff en undirstraumurinn sem myndaðist dró Jeff með sér og hann hvarf úr augsýn Keith. Jeff fannst látinn 5 dögum síðar.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s